Sorkarin ‘No-Fail’ policy tihtawp a tum

Sorkar laipui chuan school naupang, Class 5- 8 inkarte fail tir theih lohna policy, ‘no detention’ or ‘no-fail’ policy tihtawpna tur bill chu Parliament-ah putluh a tum niin, Human Resource Development Minister Prakash Javadekar chuan a sawi.

Minister chuan March thlaa exam-naah Class 5-8 inkar zirlai pass zo lote chu pawl sawn tir ngawt loin May thlaaah exam ṭhat tir leh an ni dawn tih a sawi. Mahse May thla exam nawnnaa an fail leh a nih chuan an pawl sawntir an ni tawh dawn lo tih a sawi.

Tuna policy hman mek, ‘no-detention’ policy hnuaiah hian zirlai, Class 8 hnuai lam chin zirlaite chu pawl sawn tir vek tura tih an ni. Mahse state eng emaw zatin he policy hian education quality a tihniam thei niin an sawisel a ni. State 25 chuan no-fail policy tihtawp hi an thlawp thu an sawi tawh niin minister chuan a sawi bawk.

Union Minister chuan naupangte fail tir awih loh policy hman hi a tuartu chu zirlai naupangte bawk an nih thu a sawi a, hmun tam taka sorkar school-ah chuan naupangte chu mid-day meal ei tur chauhah an kal thu te, thil an ei zawhah an haw leh mai ṭhin thute a sawi. Hei vang hian he policy hi thlak a ngai a ni tiin, House-a bill putluh tum pawh chu lugnrual taka pass a nih ngei a beisei thu a tarlang.