Naidu-a’n Pakistan a vau

National Democratic Alliance (NDA) vice president candidate M Venkaiah Naidu chuan nimin khan Pakistan chu vauin, 1971 War hrereng turin a ti a, firfiakte an puih leh an thlawp ṭhin chuan eng kawng mahin a pui dawn lo tih a sawi.

Nimina New Delhi-a Kargil indonaa martarte puala hun hman, Kargil Parakaram Parade a hmanpuinaah, Naidu chuan rawlrala chetna chu mihringte hmelma a nih thu a sawi. Naidu chuan ṭhenawm ram chuan firfiakte a puih leh thlawp chuan a pui dawn lo tih sawiin, kum 1971 kha hre reng a, pakistan chu an rama hmasawnna leh boruak muanawm a awm theihna tur buaipui zawk tura a duh thu a sawi. Kum 1971 Bangladesh Liberation War-a India hnehna chan kha hre reng turin Pakistan chu a duh tih a sawi a ni.

Naidu chuan Kashmir chu India ram chhung a nih thu sawiin, India chuan a ram inches khat pawh a hloh dawn lo tih a sawi.

India chu remna leh muanna duhtu, a pawng a taka ramdangte bei ngai lo a nih thu Naidu chuan a sawiin, “Indo te, intihbuai te kan duh lo a, tharum thawhnate hi kan duh lo. Ṭhenawm ramte nen boruak ṭah tak neih kan duh a ni”, a ti.