Rel-ah ei tur sem dan policy thar hmang dawn

Comptroller and Auditor General chuan ramchhunga khualzin phur rela chaw semte a ṭawpin a thianghlim tawk lo hle niin Parliament-a report a thehluhah a tarlang a, ei tur semte chu ei tlak loh ni hialin a sawi.

CAG report chuan kum 2016 October leh kumin July thla chhunga rel station hrang hrang endiknaah, ei tur semte chu a thianghlim lo hle a, ṭhenkhat chu a hmuar hial niin a sawi. Rel ṭhenkhatah chuan ei tur dahṭhatna hmunah sazui leh rannung dangte hmuh a nih thu a sawi.

Hei bakah hian thingpui siamna atana tui hmante pawh a thianghlim lo niin a sawi bawk.

Parliament-a CAG report thehluh a nih hnuah, Ministry of Railway chuan khualzinte hnena ei tur thianghlim leh ṭha zawk pek an nih theihna turin Catering Policy a siam thar a, he policy thar hi nimin khan a sawichhuak. Ministry chuan Indian Railway Catering and Tourism Corporation (IRCTC) chu choka lama ei tur dahna leh sawngbawl dan te, ei tur ṭhat lam chin enfiahtu atana mawhphurtu a nih thu a sawi a, IRCTC hian mobile unit zawng zawnga service chu a enkawl dawn a, heng unit-a ei turte chu IRCTC enkawl leh pawmpui choka aṭang chauha pekchhuah an ni ang.