Gujarat-a eptu hruaitu Vaghela a bang
Gujarat Assembly-a opposition leader, Congress hruaitu hlun Shankersinh Vanghel chu Pathianni khan eptu hruaitu a nihna aṭangin a bang. A banna lehkha hi Congress president Sonia Gandhi hnenah a thawn a ni.
Party president hnena banna lehkha a thehluh thu media mite hmaah sawiin, Vaghela chuan assembly inthlan hmabaka an awm reng laiin, Congress hruaitu ṭhenkhat te chuan amah an phiarru nia sawiin, a tan thlan tur dang a awm ta lo niin a sawi.
Vaghela hian kar hmasa Zirtawpni khan Congress Party-in an hnawtchhuak niin a lo sawi tawh bawk. Mahse party hotute chuan hei hi chhangin, Vaghela chungah eng action mah an lak loh thu leh, amah duhthu anga awm zawk a nih thu an sawi thung.
Sonia Gandhi hnena banna lehkha a thehluhah, Vaghela chuan UPA sorkara union minister-a a dah avangin lawmthu a hrilh a, mahse assembly inthlan tur hmachhawn dan tur chungchanga a rawtna siamte chu party lam hotuten an pawmsak loh avangin a tan thlan tur dang a awm lo niin a sawi. BJP emaw, political party dang emaw zawm a tum lo tih a sawi. Vaghela chuan Kapadwanj bial aṭanga Congress MLA a nihna pawh bansan a tum thu sawiin, Assembly speaker hnenah banna thehluh a tum thu a sawi bawk. Gujarat assembly inthlan hi kumin December thla hian neih a ni ang.
RSS hruaitu hlui Vaghela hian kum 1998 khan BJP chhuahsanin Congress Party a zawm a ni. Mahse kum 2009 Lok Sabha inthlana Godhara biala a chak zo loh hnu khan, Congress hruaitu ṭhenkhatten paihthlak tumin an phiarru niin a sawi.