Swine flu vangin mi 600 thi tawh
Sorkar laipui chuan kumin chhungin ram chhung hmun hrang hrangah swine flu, H1N1 vangin mi 600 an thi tawh niin a sawi a, hei hi nikuma thi aiin a letin an tam zawk a ni.
Union Health Minister JP Nadda chuan Rajya Sabha-a zawhna ziaka a chhannaah he thu hi a sawi a, swine flu vanga thi zinga 50% chu Maharashtra state ami an ni a, July 9 thleng khan mi 284 an thi tawh a ni. Swine flu vei 2,324 hmuh an ni bawk.
Gujarat-ah swine flu vei mi 289 hmuhchhuah niin an zinga 75-in an thihpui a, Kerala-ah a vei mi 1,127 zinga 63 an thi bawk. Rajasthan-ah mi 407 in an vei a, mi 59-in an thihpui a, Karnatakah-ah a vei 2,377 hmuh niin 15 an thi, Telangana leh Tamil Nadu-ah pawh swine flu vanga thi hi 17 leh 15 an awm a, a vei 1,443 leh 2,896 hmuhchhuah an ni bawk.
Kumin chhungin ramchhung hmun hrang hrangah swine flu vei hmuchhuah hi 12,460 an tling tawh a, nikuma hmuhchhuah zat chu 1,786 an ni.
Swine flu damdawi, Oseltamivir chu June 22 aṭang khan schedule H1-ah dah a ni a, hemi awmzia chu he damdawi hi licensed chemist-te’n an zuar chhuak thei vek tawh a ni. Hemi hma hian Schedule X category-ah dah a ni ṭhin a, pharmacy thlan bikte chauhin an stock-in an zuar chhuak thei ṭhin a ni.
Sorkar laipui chuan swine flu vei hmuhchhuah tamna - Gujarat, Kerala, Karnataka leh Telanganga-ahte central team a lo tir tawh bawk.