President thar Ram Nath Kovind lalut
Ram Nath Kovind chu nimin khan India ram President 14-na atan rinawmna thu tiamtira lakluh a ni ta. Dalit hnam zingah President dinhmun luah thei pahnihna a ni.
Nimin chhun dar 12:15 khan Parliament Central Hall-ah President thar lakluh inkhawm hi neih a ni a, Chief Justice of India JS Khehar chuan rinawmna thu a tiam tir a ni. President thar hi lakluh a nih veleh a lawmna atan 21-gun salute pek a ni a, hemi hnu hian thu a sawi zui nghal a ni.
President Ram Nath Kovind chuan India ram chu economic leader ni tura siam a ngaih thu a sawi a, India ram hlawhtlinna leh ropuina chu hnam chi hrang hrang awmkhawmna hmun a nih vang a ni, a ti. Hnam leh sakhaw hrang hrang lungrual taka awmkhawmna ram a nihna chu India ram dangdaina a nih thu sawiin, mi chi hrang leh hnam hrang, kalphung leh nundan phung dang tak takte lungrual taka awmna hmun a ni, a ti.
Kovind chuan president mawhphurhna chelh tura thlan a ni chu lawmawm a tih thu a sawi a, ram mipui vaibelchhe 125-te hnenah zahna hlanin, amah an rin ang ngeia dik taka hnathawh a tiam a ni.
President lakluh inkhawmah hian Prime Minister Narendra Modi, PM hlui Manmohan Singh leh Deve Gowda, presidnet hlui Pratibha Patil, Parliament MP leh state chief minister-te an tel.
Kum 71 mi, Bihar Governor hlui Kovind hi President thlanna neih zawh takah rorellai BJP kaihhruai NDA chuan candidate atan an ruat a, inthlan neih zawh takah khan eptu candidate inṭawm Meira Kumar nen an inkhing a ni. Kovind hian electoral college vote nuai sarih chuang hmuin, Kumar-i hi a hneh a ni.
President thar hian lakluh a nih hmain Rajghat tlawhin Mahatma Gandhi zahna a hlan a, hemi hnu hian president kalchhuak Pranab Mukherjee hmu turin Rashtrapati Bhavan a pan leh a ni. An pahnih hian sakawr tawlailir hmangin Parliament lam an pan dun nghal a ni. President lakluh inkhawm zawh hnu hian Rashtrapati Bhavan lam an pan leh a, Mukherjee chuan President thar hi Bhavan a fan pui a ni. Hemi hnu hian Mukherjee hi a bungalow thar, 10, Rajaji Marg lamah a insawn zui nghal a ni.