Gujarat-ah ruahsur nasa avangin mi 25,000 sawnchhuak

Gujarat-ah ruahsur avanga tuilian nasa tak a thlen a hlauhthawnawm avangin mi 25,000 chu hmun him lamah sawnchhuah an ni tawh.

Gujarat state chhung hmun hrang hrangah ruah a sur nasa hle a, a bikin hmarlam bialah ruahsur nasa avangin harsatna an tawk mek a ni. Ni hnih liamta chhung­in ruahsur avang­a harsatna tawk mi 1,000 te chu chhan­chhuah an ni tawh a, mi 15,000 vel chu hmun him lamah thiarchhuah an ni tawh bawk. Gujarat-ah hian ruahsurin chhiatna a thlenah mi 70 vel an thi tawh a ni.

Rajasthan state pawhin ruahsur nasa avangin harsatna an tawk mek a, lui tam takin an kuang an luang­liam tawh a, mi pahnih an thi tawh bawk. Kawngpui leh rel kawngte chu tuiin a chim nasa hle a, minister Gulab Chand Kataria chuan Jalore, Pali leh Sirhohi district-te dinhmun chu a ṭha lo hle niin a sawi.

Ruahsur nasa hian Gujarat leh Rajasthan-a rel service pawh a nghawng buai a, rel 17 vel chu dintir an ni a, rel ṭhenkhat chu kawng dangah tlantir an ni bawk. Gujarat Chief Minister Vijay Rupani chuan an state-in harsatna a tawh mek chungchang hi Priem Minister Narendra Modi pawh a hriattir tawh a, PM hian thlawhtheihna hmanga enkual a tum a, hemi hnu hian CM, minister leh state official-te chu Ahmedabad airport-ah meeting neihpui a tum bawk a ni.