Bihar : CM Nitish Kumar kaihhruai sorkarin fiahna paltlang

Bihar chief minister Nitish Kumar kaihhruai ṭangrual sorkar thar, ‘Mahagathbandhan' chu nimin khan Assembly special session neiin fiah a ni.

Member 243 awmna, Bihar Legislative Assembly-ah MLA 241 nei mekin, an zinga 165 chuan sorkar an thlawp a ni. BJP hian MLA 77 a nei ve bawk.

Sorkar fiah a nih hma hian Assembly Speaker, BJP MLA Vijay Kumar Sinha chuan banna a thehlut. Deputy speaker Maheshwar Hazari kuta mawhphurhna hlan loin, session kaihruai turin JD(U) hruaitu hlun Narendra Narayan Yadav a nominate zui chuan sawisel a hlawh

Rorellai, Janata Dal-United (JDU) leh Rashtriya Janata Dal (RJD) chuan Sinha chet dan chu sawiselin, ram danpui kalh a ni, an ti. Hazari chu Speaker chamber luah tur leh, sorkar fiahna neih pawh kaihruai turin an ti nghal bawk a ni.

Bihar assembly special hi August 26 thleng pawhsei a ni bawk.

Nitish Kumar hian BJP nena an thawhdunna titawpin CM a nihna aṭangin a bang a, a ban tukah RJD leh party dangte nena thawkhoin ṭangrual sorkar thar an din leh nghal a,August 10 khan Chief Minister atan lakluh a ni leh nghal bawk. Bihar CM atan hian ṭum riat lakluh a ni tawh a ni. RJD hotu, Tejashwi Yadav chu deputy chief minister tan lakluh a ni bawk a ni.

CBI-in RJD hruaitute in dap
Bihar-a Janata Dal-United (JDU) leh Rashtriya Janata Dal (RJD)ṭangrual sorkar thar chu nimin khan House-ah fiah a ni a, sorkar thar fiah a nih ni tak hian Central Bureau of Investigation (CBI) chuan RJD hruaitu hlun pathumte in an dapsak.

CBI hian UPA-I sorkar laia Railway Minister, Lalu Prasad Yadav hun laia railways hnuaia hna lak dana thil fel tawk lo awm kaihhnawihah RJD hruaitute in hi an dap niin an sawi.

RJD hruaitu in an dapsakte hi - Rajya Sabha MP pahnih - Ahmad Ashfaque Karim leh Dr Faiyaz Ahmad bakah, Bihar Legislative Council member Suni Singh-te an ni.

Bihar chief minister hlui, Lalu Prasad-a nupui Rabri Devi chuan, "Nitish Kumar kaihhruai sorkar thar a ding a, BJP ni lo party dang zawngin min thlawp a, hei vang hian an hlau a ni. CBI hi min tihhlauhna atan an rawn hmang a, mahse kan hlau dawn lo. Hei hi a vawi khat thlenna pawh a ni lo," a ti. RJD thupuangtu chuan Bihar-ah BJP-in thuneihna an chan tak loh avangin CBI leh central agency dangte pawh an rawn che chhuak ngei dawn niin Thawhlehni zan khan a lo sawi lawk tawh bawk.

Lalu Prasad hi kum 2004-2009 khan union railway minister a ni a, a hun laia thil thleng nia sawi chungchangah CBI hian kum 13 hnua in dap a ṭul nia a ngai a nih chuan, eng ang agency nge a nih tupawhin an hrethiam tawh ang, tiin RJD chuan an sawi.

RJD MP Manoj Jha chuan ED, IT leh CBI emaw pawh ni se, BJP hnuaia thawk vek niin an hnathawh dan tur pawh BJP in a duan sak vek a ni, a ti.