AAP-in sum hmanga an MLA-te thlem luh tumah BJP puh

Delhi-a rorellai, Aam Aadmi Party (AAP) chuan prime minister Narendra Modi kaihhruai sorkar laipui chuan a theih dan ang anga Delhi sorkar paihthlak tumin a bei tih an sawi.

Nimin khan AAP hruaitu panga-te chuan Delhi-a press conference an nei a, BJP chuan AAP hruaitute beihna atan central agency-te a hmang a, AAP MLA-te chu sum leh vauna hmangin an party-a luh tir tumin an vehthlem bawk niin an puh. BJP chuan an puhna hi a pha a, AAP chuan Delhi liquor policy-a eirukna thleng hliahkhuh tumin thil dangah an puh kual niin an sawi ve thung.

AAP thupuangtu leh Rajya Sabha, Sanjay Singh chuan PM Modi kaihhruai BJP sorkarin central agency-te hman ṭangkai a tum dan chu a la phawrh mualpho dawn tih a sawi. BJP chuan Maharashtra-a Shiv Sena party aṭanga Eknath Shinde a thlem chhuah ang kha Delhi deputy minister Manish Sisodia chungah tih a tum a, mahse an hlawhchham a ni, a ti.

BJP member-te chuan AAP MLA-te an vau bawk a, Rs vbc 20 pek a intiamna chu pawm tura tiin, an pawm loh chuan Sisodia angin CBI case an nei ve dawn a ni, tiin an hrilh a ni, a ti.

Singh chuan an party MLA - Ajay Dutt, Sanjeev Jha, Somnath Bharati leh Kuldeep Kumar-te chu BJP hruaitute chuan biain, BJP an zawm chuan Rs vbc 20 pekah an thlem a, MLA dang an hruai luh theih phei chuan Rs vbc 25 pek an tiam a ni, tiin a sawi. Press conference-ah hian BJP-in a thlem nia sawi MLA palite pawh hi an awm ve a ni.