Gujarat-ah ruahsurin tumkawng tichhia State hrang hrangah ruahsur vangin harsatna thleng

Gujarat state-a ruahsur nasa avanga tuilian chuan zual lam a pan a, ruahsur nasa hian Ahmedabad airport runway a tichhia a, hei vang hian nimin khan Air India flight pahnih chu Mumbai-ah thlawh pen tir an ni.

Prime Minister Narendra Modi chuan tuilian tuarte chhanchhuah leh chhawmdawl hna thawhna atan cheng vaibelchhe 500 pek a nih thu a puang. Tuilian avanga thi mi 83 chhungte hnenah cheng nuai hnih ṭheuh pek an ni dawn a, hliam tuarte chu Rs 50,000 ṭheuh pek an ni bawk ang.

Prime Minister hian thlawh­theihnain Gujarat-a tuilenna hmunte a enkual a, Chief Minister Vijay Rupani leh Deputy Chief Minister Nitin Patel-te’n an ṭawiawm.

District ṭhenkhatah chuan tui­lian avang hian mi tam tak tlawhpawh theih lohin an awm a, heng mite chhanchhuah hna thawk tur hian sipai eng emaw zat tirh an ni. State sorkar chuan state puma mipuite chu fimkhur tura chahin, ṭanpui hna thawk turin Army, Air Force leh NDRF team te a ko bawk.

Gujarat leh Rajasthan-te chuan ruahsur nasa avangin tuilian an tuar mek a, Gujarat-ah chuan hmun hniam lama cheng mi 30,000 vel chu sawnchhuah an ni tawh. Rajasthan-ah pawh Jalore, Sirohi leh Pali district-te chu tuilian avanga harsatna tuar nasa zual an ni a, tuilian tuarte chhanchhuah hna hi thawh mek a ni.

West Bengal-ah pawh Birbhum, Purulia, West Medinipore leh Hoogly district-ah ruahsur nasa avangin hmun tam takah harstna a thleng a, meteorological department-in ruah nasa zawkin a la sur dawn nia a sawi avangin Chief Minister Mamata Banerjee-i chuan nimin tlai khan senior official-te meeting a neihpui a, hma lak dan turte an ngaihtuah. Mahse CM Banerjee-i chuan an state chu tuilian thlen mai hlauhthawnawm awmin ala awm lo niin a sawi.

Odisha state-ah pawh ruah sur nasa avangin state hmarlama lui lian pathumte chuan hlauhawm chhinchhiahna an pel tawh a, Keonjhar, Bhadrak leh Jajpur district thuneitute chuan chhan­chhuah hna thawk turin an inbuatsaih mek a ni. Odisha Chief Minister Naveen Patnaik chuan thuneitute chu venthawn thilah hmun hniam lama chengte chu sawnchhuak turin a hrilh tawh bawk. Jharkhand state-ah pawh ruahsur nasa avangin lui tam tak a lian tawh a, Ranchi, East Singhbhum, Hazaribagh, Bokaro leh Giridih district-ah chuan ruah a sur nasat avangin nimin kha zirlai, Class VIII chin hnuai lam tan chawlh an puang a ni.