Anganwadi leh school-te chhunfin tum

Union Ministry of Human Resource Development chuan Rajasthan state tihdan entawn a, anganwadi leh school te chhunfin dan tur chu Women and Child Development Ministry a sawipui mek.

Rajasthan sorkar hian kum hnih kalta chhung khan a state chhunga 11,000 anganwadi-te chu school nen a chhunfin a vek a ni. Rajasthan education minister Vasudev Devnani chuan a tirah meter 500 bial chhunga awm, school leh anganwadi-te chu chhunfin phawt an ni tih sawiin, hemi hnu hian awmna inhlat deuha awmte pawh chhunfin chhunzawm an ni tih a sawi. School compound chhungah hian anganwadi pual hian room hran siam a ni a, pre-primary syllabus te siam a nih thu a sawi bawk.

Devnani chuan anganwadi leh school chhunfin chu kawng hrang hrangah hlawkna a awm thu sawiin, school-a inziaklut an tam phah a, anganwadi naupangte chuan school environment an chhim hma theih phah a, hei bakah hian school chuan angwandi inenkawl dan a thlirpui reng thei a, hei hian an zirna level pawh nasa takin a pui a ni, a ti.

Rajasthan education department joint secretary Sanjay Kumar pawhin he program avang hian naupangte chuan private school aiin sorkar school an luh phah thei dawn a, hei bakah school lamin angawandi kalpui a nih dan chu an enpui reng theih avangin centre pawh hi mumal zawkin a inhawng thei dawn niin a sawi.