Bihar-ah JD(U)-BJP ṭangrual sorkar thar a ding ; CM atan Nitish Kumar lalut nawn

Bihar-a JD(U), RJD leh Congress ṭangrual, Grand Alliance-te thawhhona chu a tawp a, JD(U) leh BJP-te’n ṭangrual sorkar thar an din a, Chief Minister ni lai Nitish Kumar chu nimin khan lakluh nawn a ni.

CM Nitish Kumar hi Nilaini zan khan Grand Alliance sorkar aṭanga bangin, CM a nihna aṭangin a bang a, nimin zing khan BJP nena thawkdunin sorkar thar hi an din nghal a ni. Nitish Kumar hi CM atan lakluh leh nghal niin, deputy CM atan BJP MLA Sushil Modi chu lakluh a ni bawk.

Member 242 awmna Bihar assembly-ah sorkar thar siamtu, JD(U), BJP leh an thawhpui bakah an mahnih thlawptu MLA-te hian seat 132 an nei pha a, sorkar siam tura seat neih neih ngai zat seat 122 chu 10 in an khum an ni.

Grand Alliance-te thawhhona chungchanga Nitish Kumar-a lung­awi lohna chhan ber nia sawi chu RJD hotu, Lalu Yadav Prasad-a fapa, a deputy chief minister ṭhin Tejashwi Yadav vang nia sawi a ni. Tejashwi Yadav hi CBI-in eiruk thubuai an siamah a hming a lang a, mahse heti chung hian deputy CM a nihna aṭang­in a bang duh lo a, a pa ngei pawhin a ban a remti lo nia sawi a ni. Hei hi Nitish Kumar-a’n CM a nihna aṭanga a ban chhan ber nia sawi a ni.

Kumar chuan Tejaswhi chung­changa buaina chu chinfel tumin theih­tawp a chhuah tih sawiin, midangte pawh bang turin a phut lo tih a sawi. Tejaswhi chu eirua puh a nih chung­chang sawifiah turin a ti a, mahse a kaihhruai sorkar chu a hmingchhiat tawh avangin chief minister nih zui zel chu a dik theiin a hre lo a, banna a thehlut ta niin a sawi.

Nilaini zan khan Nitish Kumar hian governor Keshri Nath Tripathi hnenah banna thehlutin, governor hian a lo pawmsak nghal a ni. Hemi hnu hian BJP hruaitu Sushil Modi chuan governor hnenah hian sorkar thar siam turin MLA thlawptu an ngah tawk tih a hrilh ve leh nghal a ni.

Governor Tripathi chuan nimin khan CM thar atan Nitish Kumar hi a lalut a, lakluh a nih aṭanga ni hnih chhungin Assembly-ah thlawptu a ngah tawk tih fiah turin a ti bawk. Sorkar fiah a nih hnuah cabinet minister tharte pawh lakluh an ni ang.

Grand Alliance hnuaia Nitish Kumar-a thawhpui ṭhin, Congress party vice-president Rahul Gandhi chuan JD(U) hruaitu Kumar-a chu a dem thu a sawi. Rahul Gandhi chuan, “Nitish Kumar hian mi a phatsan a ni. Ni rei vak lo liamtaah khan kan inhmu a, khami ṭum pawh khan eng thil mah a sawi lo. Mahse tuna a thil tum hi BJP nen hian thla eng emaw zat liamta aṭang khan an lo ruahman vek tawh a ni”, a ti. Bihar mipuite chuan chi bing leh sakhaw tihbik nei lo tana a thawh avangin Nitish Kumar chu hnehna an chantir a, mahse tunah chuan a mimal hlawkna duhin midangte a thawhpui leh ta zawk a, hei hi politics-a harsatna awm fo ṭhin chu a ni, tiin a sawi bawk.