Sasikala chungchang report petu police hnenah legal notice pe

Bengaluru jail-a tang mek, AIADMK (Amma) hruaitu MK Sasikala-i’n jail official-te hnena thamna a pek avanga special treatment pek a nih dan chungchang report-tu, DIG hlui, D Roopa-i chu Karnataka DGP hlui, H N Satyanarayana Rao chuan legal notice a pe.

Rao-a’n Roopa-i hnena notice a pekah hian, ni thum chhunga chanchinbu hrang hrangah ngaihdam dilna tichhuak turin a phut a, hei hi a ti lo a nih chuan a laka thubuai thehluh a tum tih a sawi a, a tihmingchhiat manah hian cheng vaibelchhe 50 thleng chawitir theih a nih thu a sawi bawk.

Roopa-i hian a report-ah Sasikala-i hian jail official-te hian thamna cheng vaibelchhe hnih a pe a, thaman dang zingah hian Rao pawh hi a tel tih a sawi a ni. Roopa-i hnena legal notice pek hi phek sariha chhah niin, Rao chuan a puhnate chu thu dik lo a ni a, hei vang hian ni thum chhung ngeia ngaihdam dilna tichhuak turin a phut a ni.

Notice pekah hian Roopa-i chuan Rao-a’n kum 30 chuang department tana a lo thawhnate a tihhmingchhiat sak a, CBI leh Lokyukata lamah thlengin a hming a tih­hliausak a ni, a ti. Roopa-i chuan tan-in chhunga inenkawlna dik lo awm chungchang te, thla pawh a lak thute a sawi a, mahse Sasikala-i tan choka hran pek a nih tih a sawi te, lal ang maia enkawlna a dawn thu a sawite chu finfiahan tur thlalak engmah a nei chuang lo niin a sawi bawk.