"BJP-in AAP MLA 40-te a pel mek" Arvind Kejriwal-a'n emergency meeting a ko

Delhi-a rorellai, Aam Aadmi Party (AAP) chuan BJP chuan an party tihdarh a, an MLA-te rukchhuah tumin a pel mek niin an puh. Hei vang hian nimin khan Delhi chief minsiter Arvind Kejirwal chuan AAP MLA emergency meeting a ko.

AAP hian MLA 62 nei mekin, nimina CM chenna ina meeting-ah hian an zinga MLA 53 an tel. Meeting-a tel ve lo MLA-te pawh hi an biakpawh vek thu an sawi. Party MLA zinga 12 chuan BJP-a lut tura sawmna an dawng ngei tih an sawi a, mahse a tawp thlengin Kejriwal chu an thlawp tur thu an sawi.

Meeting zawhah Kejriwal leh MLA-te hi Mahatma Gandhi thlan, Rajghat-ah kalin, BJP-in Delhi-a AAP sorkar paihthlak tuma beihpui a thlak mekna, Operation Lotus a hlawhchham theihna atan an ṭawngtai zui nghal a ni.

Arvind Kejriwal chuan, "BJP hian kan MLA 40-te chu chhuak tura thlemin tham an tum tih ka lo hria a, mahse MLA pakhat pawh an thlem chhuah theih loh avangin ka lawm hle a ni," tiin chanchinthar lakhawmtuten an kawmnaah a sawi.

Member 70 awmna Delhi assembly-ah hian AAP hian MLA 62 neiin BJP hian pariat a nei. BJP hian majoritiy nei tur chuan MLA 28 a mamawh belh a ni. Anti-defection law hnuaiah, AAP MLA 40 an thlemchhuah theih chuan, heng MLA-te chungah hian action lak theih a ni dawn lo a ni.

AAP hruaitute chuan an party MLA thlemchhuah an tumte hi BJP chuan Rv vbc 20 pek an tiam a, midang an hruaichhuah theih chuan Rs vbc 25 pek an tiam bawk tih an sawi. Kejriwal chuan MLA 40 lei chhuahna tura BJP-in Rs vbc 800 zet a neih theih dan chu a zawt let bawk. An sum hmuhna chu Central Bureau of Investigation (CBI) leh Enforcement Directorate (ED) in an chhui chian a ngai tih party hruaitute chuan an sawi