Agnipath scheme : Petition lutte chhang turin sorkar laipui hrilh

Sorkar laipuiin sipai lak dan tur a duan thar, Agnipath scheme duh lohtu ṭhenkhatin Delhi High Court-a petition an thehluhte chhang turin sorkar laipui hrilh a ni.

Delhi High Court chuan petition lutte hi a stay dawn lo a, chief justice Satish Chandra Sharma leh justice Suhramonium Prasad awmna bench chuan sorkar laipui chu sawifiah turin a ti zawk a ni.

Kumin June 14 khan sorkar laipui chuan armed force pathuma sipai ṭang tur lakna dan thar a siam, Agnipath scheme hi a puang a ni. He scheme hnuaiah hian kum 17 leh a chanve leh kum 21 inkarte chu kum li chhung atan sipaiah lak an ni phawt dawn a, an zinga 25% chauh chu sipaiah kum 15 dang an ṭan chhunzawm thei ang.

Agnipath scheme puan anih rual hian state hrang hrangah duh lohna lantir a ni a, hmun ṭhenkhatah phei chuan buaina te a chhuak a ni. Lungawi lohna lantir a nih hnuah sorkar chuan sipai ṭang tur lak theih kum bithliah chu kumin atan siam ṭhain, kum 23 chinah a tisang leh a ni.