Supreme Court-in Gujarat sorkar hnenah hriattirna pe

Gujarat sorkarin kum 2002-a Gujarat-a intualvuakna thlen ṭuma Bilkis Bano pawngsual rawna puha thiam loh chantir, mi 11-te a chhuah zalen chungchangah Supreme Court chuan insawifiah turin hriattirna a pe.

Mi pawngsual rawntu, mi 11-te hi kumin Independence Day khan chhuah zalen an ni a, chhuah an nih chungchangah hian Communist Party of India (Marxist) Politburo Member Subhashini Ali, Trinamool Congress MP Mahua Moitra leh midang pakhat chuan Supreme Court-ah petitoin an thehlut a ni. Gujarat-a BJP sorkar thutlukna siam hian sawizui a hlawhin, political party dangte bakah mi hrang hrang sawisel pawh a tawk nasa hle.

Bombay High Court judge hlui, justice UD Salvi pawhin BJP sorkar thiltih dan hi sawiselin, mi 11-te a ngaihdam dawn hian an thubuai ngaihtuahtu judge an berawn em tihte a zawt. Hei bakah sorkar laipui an rawn em tih leh, an rawn a nih chuan eng angin nge a lo chhan tihte a zawt bawk.

Dam chhung tang tura hrem, mi 11-te hi Gujarat sorkar hian a remission policy hnuaiah August 15 khan Godhra sub-jail aṭangin a chhuah zalen a, tang chhuakte hi BJP hnuaia pawl nia sawite chuan chithlum leh parṭhi nen an lo hmuak a, BJP MLA pawhin tang chhuakte lawmna thu hi a sawi bawk.

He pawikhawihna thlen lai hian Bilkis Bano hi kum 21 mi niin, thla nga mi nau a pai bawk a ni.