Nitish Kumar-a’n fiahna a paltlang

Bihar Chief Minister atana lakluh nawn leh, Nitish Kumar chuan nimin khan assembly-ah fiahna a paltlang. Nitish Kumar-a kaihhruai JD(U)-BJP ṭangrual sor­kar thlawptu hi MLA 131 an awm a ni.

Nitish Kumar hian Nilaini zan khan RJD, Congress leh JD(U) thawhhona, Grand Alliance sorkar aṭangin a banga Governor hnenah chief minister a nihna

aṭanga banna a thehlut a, a tuk Ningani khan BJP nen thawkdunin sorkar thar an din nghal a, chief minister atan lakluh nawn leh nghal a ni.

Nimina sorkar fiahnaah hian House member 243 zingah sorkar thar thlawptu lamah vote 131 a tla a, a thlawp lo lamah vote 108 a tla. MLA pali-in vote an thlak lo a, independent MLA pali zingah pahnihin Kumar hi an thlawp bawk.

RJD leh Congress-in vote thlakna atana secret ballot hman an phutna chu speaker Vijay Kumar Choudhary chuan a hnawlsak.

Vote lak a nih hma hian eptu hruaitu leh deputy chief minister hlui, RJD hruaitu Tejashwi Yadav chuan thu a sawi a, eirua an puhna chungchangte chu thu dik lo a nih thu a sawi. Yadav chuan kum 28 mi chauh ni chunga hlawhtlinna a chan chhoh dan chu JD(U) lam chuan an ngaimawh a, amah pai­thlak dan tur an ngaihtuah niin a puh a, dik taka hna a thawh dante chu Kumar-a pawhin a hriatpui a ni, a ti.

Nitish Kumar-a’n RJD leh Congress nena an thawhhona a chhuahsan chhan berah Tejashwi Yadav hi puh a ni. Eiruk thubuai siamsak a nih hnuah Yadav-a hi deputy chief minister a nihna aṭanga bang turin a duh a, mahse Yadav-a pa, Lalu Prasad Yadav leh a party, RJD chuan a ban hi an remti lo a ni. Tejaswhi Yadav chuan Nitish Kumar hian bang tur pawhin a ngen lo niin a sawi.

Patna High Court-ah petition thehlut
Bihar-a JD(U) leh BJP ṭangrual sorkar din a nih chungchangah Pa­tna High Court-ah petition pahnih thehluh a ni. Petition-te hi Jitender Kumar leh RJD MLA Saroj Yadav leh Chandan Kumar Verma-te thehluh a ni. Petition thehluttute chuan JD(U), RJD leh Congress ṭangrual sorkar ṭhiah a nih hnuah Governor chuan party mala MLA ngah ber, RJD chu sorkar thar siam turin a sawm lo a, hei hi ram danpui kalh a ni, an ti. 

Governor hian chief minister a ban hnuah RJD hi ko loin, BJP-JD(U) ṭangrualin sorkar an siam theih thu an sawi a pawmsak nghal niin an sawi. Governor thiltih dan chu ram danpui kalh a nih vangin court chu inrawlh turin an ngen a ni.