Rajya Sabha-ah eptuten lungawi lohna lantir

Nimina Rajya Sabha inkhawmah eptu party, Congress chuan Gujarat police-te’n an party MLA pakhat an rubo nia sawiin lungawi lohna an lantir.

Inkhawm ṭan a nih hnuin Congress member-te hi House laiah chhuak khawmin, BJPchuan Rajya Sabha inthlanah an party candidate a chak theih nan Congress MLA chu police-te an rukbo tir niin an puh a, BJP sorkar lakah lungawi lohna thute an aupui a ni.

Deputy Chairman PJ Kurien chuan Congress member-te aubuai avang­in inkhawm pawh a titawp lailawk a, inkhawm chhunzawm a nih leh hnuah pawh a ngai ang bawkin a au bengchhen leh avangin chhun dar 12 thleng atan inkhawm a titawp leh a ni. Hemi hnuah pawh eptu lam hian rorel tibuai zawnga an au zui zel vangin nimina Rajya Sabha inkhawm hi ṭum li zet tihtawp a nih phah a ni.

Congress Party chuan an party MLA pakhat, Punabhai Gamit chu district Congress executive committee-a a tel zo, MLA dang ina thingpui in tura a kal chu district superintendent of police chuan alo ru bo a, MLA hnenah hian assembly inthlan lo awm turah Congress party chuan ticket a pe dawn lo a, hei vang hian Congress chhuahsana BJP zawm turin a hrilh a, BJP president a hmuh theih dan tur leh ticket a chan ngei theih dan tur a lo ruahmansak dawn niin a hrilh a ni, an ti.

BJP chu police-te hmanruaa hmanga vote zawngah puhin, an chetdanah zak hle tur an ni tih, Opposition leader Ghulam Nabi Azad chuan a sawi.