Tuilian avangin mi 600 an thi tawh
Ramchhung hmun hrang hrangah tuilian avanga thi chu mi 600 an tling tawh a, mi nuai 2.26 chu ruahsur nasa leh tuilian avangin chenna in nei loin an awm mek bawk.
Rajya Sabha inkhawmah Minister of State for Home Affairs Kiren Rijiju chuan ruahsur leh tuilianin ramchhunga chhiatna thlen dan hrang hrangte a sawilang a ni. Harsatna tawk mek state-te hnenah sorkar laipuiin fund a pe chhuak lo nia sawi chungchang pawh chhangin, minister chuan state tam takin state disaster response fund (SDRF) an la hmang lo niin a sawi.
Rijiju chuan state hrang hrang aṭanga report an dawn danin mi 600-in nunna an chan tawh a, mi 2,25,998 chu camp-ah an khawsa mek a, chenna in 63,215 a chhiat bakah, thlai chinna ram hectare nuai 2.8-a zau chu tuilian leh leiminin a tichhe tawh bawk niin a tarlang.
Minister chuan tuilian tuar mek state-te tan fund tihkhawtlai sak a awm lo niin a sawi a, tuilian tuarte tan hian buhfai quintal 61,299, dal quintal 11,574, chi quintal 3,708 leh tel quintal 20,308 sem chhuah a ni tawh tih a sawi.
Kum 2017-2018 fiscal year atan hian state tina SDRF account-a central share atan cheng vaibelchhe 9,382 dah a ni a, heng zinga vaibelchhe 3,387.15 chu pekchhuah a ni tawh a ni.