Advocate-ten Jail-a inenkawlna dik lo chhui turin ACB ngen

Advocate-te chuan Bengaluru-a Parapanna Agrahara Central Prison chhunga inenkawlna dik tawk lo awm nia sawite chu chhui chiang turin Anti-Corruption Bureau (ACB) an ngen. Jail-a tang mek, AIADMK (Amma) general secretary VK Sasikala-i’n VIP treatment a dawn theih nana jail official-te hnena cheng vaibelchhe hnih a pe nia sawi pawh chhui chian an phut bawk.

Advocate S Nataraj Sharma chuan ACB hnenah complaint a thehluh thu leh, jail chhunga inenkawlna felfai tawk lo awm nia sawite chu chhui chiang tura a ngen thu a sawi. ACB hian a chhui lo a nih chuan High Court-ah judicial inquiry nei tura a thlen tur thu a sawi.

Hetih lai hian Sasikala-i’n jail official-te thamna sum a pe nia report-tu, deputy inspector general (prisons) hlui D Roopa-i chu thamna dawngtu zinga tela puh, Karnataka director general of police (prisons) hlui HN Sathyanarayana Rao chuan legal notice a pe a, notice a hmuh aṭanga ni thum chhung ngeia mipui hriatah ngaihdam dilna tichhuak turin a phut.

Sharma chuan Rao-a’n Roopa-i legal notice a pek chungchang pawh sawichhuakin, ‘Eng vangin nge hmanhmawh taka legal notice hi a pek? He mi chungchang chhui mektu Vinay Kumars report a nghak phawt tur a ni”, a ti.

Roopa-i report-ah hian Sasikala-i hian official leh jail-a thawkte thamna sum a pek avangin jail chhungah nuamsa takin a awm a, a ei siamna tur bik choka hran pawh pek a nih thu a sawi. Hei bakah hian jail-a tang zing ṭhenkhat chuan ganja an rui niin a sawi bawk.