Darjeeling-ah buaina a chhuak leh

West Bengal aṭanga Gorkhanland state hran phuta Darjeeling-a nawrh huaihawtna kalzelah kar kalta Inrinni khan buaina a chhuak thar leh.

Gorkhaland state hran siam phuta nawrh huaihawttu, Gorkha Janmukti Morch (GJM) activist leh police-te chu Inrini khan Sukna-ah annawr buai leh a, police-te silai hmehpuahah mi pakhat a thi niin an sawi. Mahse hei hi police-te chuan an pha a, silai an hmehpuah loh bakah thi pawh an awm lo niin an sawi thung.

Morch hotu Bimal Gurung chuan thuchhuah siamin, police-te chetdan chu an dem thu a sawi.

GJM hian an thil phut lantirin Darjeeling hills area-ah hian nitin lungawi lohna an la lantir chhunzawm reng a, hun rei tak chu buaina awm loin hun an hmang a ni. Mahse Inrinni khan Siliguri khaw pana kawngzawh an tum chu police-te chuan water cannon leh tear gas hmangin an lo dang a ni.

Darjeeling, Mirik, Kurseong leh Kalimpong district-ah chuan state hran phutin mi 12-te’n tiamchin awm loin chaw an nghei mek a, ni 9 chaw an nghei tawh a ni. Sorkar laipui leh state sorkar chuan Morcha-te hi inbiakna an la neihpui lo a, GJM chuan sorkar laipui chauh inbiakna neihpui an duh tih an sawi. Kar hmasa khan West Bengal Chief Minister Mamata Banerjee chuan New Delhi-ah Home Minister Rajnath Singh an hmu a, Darjeeling dinhmun a sawipui a ni.