PM-in Maan Ki Baat programme hmang
Prime Minister Narendra Modi chuan thla tina radio-a programme a hman ṭhin, Maan Ki Baat chu nimin khan a hmang leh a, ramchhunga tuilian tuar mekte tan sorkar chuan theihtawp a chhuah mek thu a sawi.
PM hian GST chungchang pawh sawichhuakin, hei hian ram economy-ah nghawng ṭha tak a nei dawn tih a sawi. Modi chuan GST chu thla khat hman a ni tawh a, a ṭhatna pawh hmuh theihin a lang nghal a, GST chungchangah hian mipuite hnenah aṭangin zawhna pawh a dawng nasa hle tih a sawi.
GST hian ram economy dinhmun pawh a siamṭha a, hun reilote chhunga economy lama a ṭha zawnga nghawng a neih dan hi khawvel huapa economist te tan pawh zir tham a ni. GST hi tax siamṭhatna ringawt a ni lo a, culture thara min hruaitu a ni, tiin PM chuan a sawi.
Modi chuan August thla hi India tan thil chhinchhiahtlak tak a ni tih a sawi. Kum 1920, August 1 khan Non-Cooperation movement ṭan a ni a, Quit India movement pawh kum 1942, August 9-ah ṭan a ni a, kum 1947, August 15-ah India chuan zalenna a hmu bawk a ni.