Ghulam Nabi Azad-a'n Congress aṭanga banna a thehlut ; J&K-ah political party thar din a tum

Congress party senior leader zinga mi, Ghulam Nabi Azad chuan nimin khan Congress party aṭanga banna lehkha a thehlut a, Jammu and Kashmir-ah political party thar a din dawn nia sawi a ni.

Sonia Gandhi hnena banna lehkha, phek nga-a thui a thehluhah, Azad hian Gandhi chhungkua, a bikin Rahul Gandhi a bei nasa hle. Rahul Gandhi chu puitling tawk lo, an party inkahhruainate tichhetuah a puh. Sonia Gandhi pawh bei telin, party hotu ber a nih lai pawhin a hming chauhin thuneihna a chang a, thutlukna pawimawh zawng zawng chu Rahul Gandhi emaw, a security guard leh a PA-te emaw siam mai mai a ni, a ti.

Jammu and Kashmir chief minister hlui, kum 73 mi Azad hian J&K Congress-a a chanvo tur ruat duh loa a hnawl hnuah Congress party aṭangin banna hi a thehlut a, an pawl tana thurawn a pekte chu ngaihsak a hlawh lo niin a sawi a ni.

Banna a thehluh hnuah hian kumin kumtawp lama assembly inthlan neihna tur, J&K-ah kalin, party thar din a tum nia a sawi thu India Today chuan a tarlang.