Noida-a tower 2 ṭhiat dawn, mi 5,000 chuang sawnchhuah an ngai

Noida Supertech twin tower, Apex leh Ceyante chu Pathianni chawhnu hian ṭhiah a ni dawn a, hei vang hian a chhehvela cheng mi 5,000 chuang bakah motor 2,700-te chu sawnchhuah an ngai dawn a ni.

Noida health department pawh India rama structure sang ber ni mek ṭhiah turah hian harsatna a thlen palh venthawn thilah theih angin a lo inbuatsaih a, sorkar facility-te bakah private hospital pathum chu thil ṭha lo a thlen palh thulhah hman theih turin an buatsaih tih official-te chuan an sawi. Ambulance paruk duty tir an ni dawn bawk a ni.

Twin tower awmna bul hnai, Emerald Court leh ATS Village-a cheng mi 5,000 chuangte chu Pathianni zan dar 7 hmain sawnchhuah an ni ang. Heng mite lirthei 2,700 leh an ran vulh 150-200 vel pawh sawnchhuah vek an ngai dawn bawk.

Tower awmna aṭanga meter 500 bialah mihring leh ran pawh kal khap a ni dawn a, he hmunah hian meter 100 dawna sang, tower pahnih ṭhiah turte chauh kal phalsak an ni ang. Tower pahnih ṭhiahna atan hian explosive kg 3,700 chuang hman a ni dawn a, hemi hmang hian second 9 chhungin tower pahnih hi chim vek hman tura beisei a ni. Tower pahnih ṭhiahna atana sum sen tur hi Rs vbc 20 vel a tling dawn a ni.

Kum 2014, April thla khan Allahabad High Court chuan tower-te hi ṭhiat turin thupek a tichhuak a, building pahniha flat leite pawh an sum pe kir leh vek turin a ti bawk. Tower pahnihah hian flat 915 awmin, heng zinga 633 chu book a ni a, hemi aṭang hian company chuan Rs vbc 180 vel a hmu a ni. Mahse flat leitute hi an leina man bakah, a pung 12% nena pe kir leh vek tura tih a ni.