Delhi Deputy CM-in CBI puhna thu dik lo a ni tih a sawi ; 'Sorkar laipui chu serial killer ang maiin a che a ni'

Delhi deputy chief minister Manish Sisodia chuan Central Bureau of Investigation (CBI)-in Delhi excise policy kaihhnawih thila a laka FIR a ziahluh chu thu dik behchhan awm lo a ni tiin, central-a BJP kaihhruai sorkar laipui chu state sorkarte nuaibo tumin serial killer ang maiin a che a ni, a ti.

Nimina Delhi Assembly special session neihah Sisodia chuan he thu hi a sawi a ni.

Prime minister Narendra Modi pawh bei zuiin, midangte hnathawh ṭha tak tak a hmuh chuan a thlaphang niin a sawi. "Prime Minister Modi chu midangte hnathawh ṭha a hmuh chuan a thlaphang a, amah ang renga inringngam lo hi ka hmu lo. Arvind Kejriwal hi prime minister lo ni ta se chuan a thil tih ang hi a ti ve lo tawp ang," tiin a sawi. Kejriwal chuan sorkar laipui hmalakna ṭha zawng zawngah PM chu theihtawpin a thlawp a, mahse PM Modi erawh chu a letling thawk a ni, a ti.

Sisodia chuan CBI officer-ten a in an dap khan darkar 14 zet hun an hmang a, a mah leh a fate thawmhnaw thlengin an dap vek a, mahse an beisei ang engmah an hmu lo tih a sawi. "Ka laka FIR an thehluh dante kha dawt thu mai a ni. Eiruknaah inhamhnawihna ka nei lo. BJP chu party dang rorelna state sorkarte nuaibo tumin a che a, hetiang taka state sorkar beihna atana hma an lak ai hian, school leh hospital sakna turin hma la zawk ta sela," tiin a sawi zui.