PM Modi-a'n Maan Ki Baat vawi 92-na hmang

Prime minister Narendra Modi chuan thla tina radio programme a hman ṭhin, Mann Ki Baat vawi 92-na chu nimin khan a hmang leh.

Prime Minister chuan India ramin zalenna a sual dan tarlanna, Swaraj serial chu en turin mipui a chah a, zirlaite pawh an zirna inah special programme buatsaih turin a chah. Hemi aṭang hian kum naupang zawkte chuan ram zalenna sualtu, pasalṭhat huaisente chanchin chuan hrechiang thei dawn niin a sawi. He serial hi Doordarshan-ah Pathianni zan dar 9-ah a chhuah ṭhin thu pawh a sawi bawk a ni. August 17 khan Prime Minister hian Parliament Library Building-a Balayogi Auditorium-a Doordarshan-produced serial – ‘Swaraj: Bharat Ke Swatantrata Sangram ki Samagra Gatha’ special screening hi a lo hmanpui tawh a ni.

PM Modi chuan malnutrition tihbona tura hmalaknaah mipuite chu theihtawp chhuah turin a chah a, September thla lo thleng tur chu festival lawm hun a nih rualin, nutrition kaihhnawiha campaign-na atan hman a ni dawn a ni, a ti. September 1-30 hi 'Poshan maah' (nutrition month)-ah hman a nih tur thu a sawi.

Modi hian nimin vek kha kum 2001-a Gujarat-a Kutch region-a lirghing rapthlak tak thleng tuartute hriatrengna atana siam, Smriti Van chu a hawng bawk. He hriatrengna hmun hi ram acare 470 vela zauah siam a ni. Kum 2001-a lirnghing kha a epicentre chu Bhuj niin, lirnghingin chhiatna a thlena thi hi mi 13,000 vel an tling a ni.

Ni hnih chama Gujarat tlawha zin, Prime Minister hian memorial a hawn hma hian Bhuj-ah hian road show a nei bawk a ni. Road show hi Hill Garden circle leh District Industries Cenre inkara, km 3-a thuiah neih a ni a, mipui pungkhawm an tam hle.