Second 9 chhungin Noida Twin Towers tichim

Noida Twin Towers chu nimin khan explosive, kg 3,700 chuang zet hmangin second kaw chhungin tichim a ni ta.

Allahabad High Court-in kum 2014-ah dan zawm loh vanga ṭhiat tura a lo tih tawh, Noida Twin Towers thubuai hi kum kua zet ngaihtuah a nih hnuah, nikum August thla khan Supreme Court chuan thla thum chhunga ṭhiat turin a lo ti tawh a ni. Mahse harsatna hrang hrang vangin kum khat hnuah ṭhiah a ni thei ta chauh a ni.

Official-te chuan twin tower ṭhiahna bawlhhlawh tlingkhawm hi ton 55,000 vel zet a tling dawn nia sawiin, a thenfainan hian thla thum vel hun a duh rin a ni.

Tower pahnih tihchhiata pakhat zawk, Apex tower-ah hian floor 32 awmin, Cyane-ah hian floor 29 a awm. Apex hi meter 103-a sang a ni a, Cyane hi meter 97 a sang a ni bawk. Tower pahnihah hian flat 900 chuang siam tura ruahman a ni a, heng zinga hmun thuma ṭhena hmun hnih chu an hralh hman a ni. Mahse Supreme Court chuan tower ṭhiahna tura thupek a tihchhuah rualin, flat lo lei tawhte chu a pung nena an sum pekir turin a ti.

Twin tower hi huan siamna hmun turah sak niin Supertech Emerald Court society chuan kum 2012 khan court-ah an khing a ni. Hemi chungchang chhui chiannaah, tower sakna tura phalna hmuh a nih danah thil fel tawk lo a awm tih hmuhchhuah chhoh niin, official ṭhenkhat pawh hrem an lo ni tawh bawk.