Sorkarin wheat, maida leh atta thawnchhuah khap

Sorkar laipui chuan wheat phut, maida, semolina leh atta-te chu Inrinni aṭang khan ram pawn lama thawn chhuah a khap. Hei hi ram chhunga a man sang zel khuahkhirhna atana a tih a ni.

Directorate General of Foreign Trade (DGFT) chuan Inrinni khan union cabinet thutlukna siam hi tichhuakin, hemi rual hian ṭul bik thilah chuan sorkar aṭanga phalna lain thawnchhuah theih an nih tur thu a sawi.

Khawvela wheat thawn chhuaktu ram lian pahnih, Russia leh Ukraine-te indona avangin ram hrang hrangah wheat supply lam a khaihlak nasa a, hei vang hian India ram wheat mamawhna pawh a san phah hle. Hei hian ram chhungah wheat man pawh a tihsan phah a ni. Kumin April-July thla chhung khan India ram aṭanga wheat phut thawnchhuah hi nikum aiin 200% in a pung hman a ni.

India ram wheat mamawhna sang mek karah, ram chhunga wheat indaih lohna thleng tur venna atan sorkar laipui chuan May thlak han wheat thawn chhuah hi a lo khap tawh a ni. Hemi hnu hian wheat phut, maida, semolina leh atta-te pawh thawn chhuah khap zui an ni ve leh tawh bawk.

Kum 2021-22 chhung khan India-in wheat phut a thawnchhuah hi USD mtd 246 man hu vel a tling. Kumin April-June thla chhung bik han USD mtd 128 a thawn chhuak hman a ni.

Ram chhungah wheat retail price chu August 22 khan 22%-a pungin, kg khat Rs 31.04 a tling a, nikum hetih hunlai angah khan kg khat Rs 25.41 a ni. Wheat flour man pawh 17%-ah sangin, kg khat Rs 35.17-ah a sang tawh bawk a ni.