Patna HC-in Bihar sorkar laka petitition thehluh a hnawl

Bihar-a JD(U) leh BJP thawkdunin ṭangrual sor­kar an siam thar lakah petition thehluh a ni a, mahse he petition hi Patna High Court chuan nimin khan a hnawlsak.

Chief Justice Rajendra Menon leh justice Anil Kumar Upadhyay awmna division bench chuan sorkar thar hian House-ah fiahna a paltlang tawh avangin court inrawlh ṭulna a awm lo niin a sawi.

Bihar Chief Minister, Nitish Kumar-a JD(U) chu kar kalta Nilaini khan RJD leh Congress party nena ṭangrual sorkar an din aṭanga inhnukdawkin, chief minister a nihna aṭangin a bang a, Governor hnenah banna a thehlut a ni. Mahse a ban tuk, Ni­ngani khan Nitish Kumar hian BJP nen thawkdunin ṭangrual sorkar thar an din leh nghal a, chief minister thar atan lakluh a ni zui nghal bawk.

High Cour-a petition thehluttute hi RJD MLA pahnih Saroj Yadav leh Chandan Kumar bakah, village head hlui Deo Narayan-te an ni. Petition-ah hian sorkar thar din a nih danah governor chu ram danpui kalha cheah an puh a, sorkar ding thar JD(U)-BJP ṭangrual sorkar pawh dan kalah din niin an sawi.

Petition thehluttute chuan Grand Alliance aṭanga Nitish Kumar a inhnuhdawh hnu leh, CM aṭanga a ban hnu khan, governor chuan dan angin Assembly-a party mala MLA ngah ber, RJD chu sorkar siam turin a sawm tur a ni, an ti. Mahse Governor hian RJD hi sawm loin, BJP-in JD(U) nena thawkdunin sorkar an siam thei tih an sawi chu a lo pawmsak nghal mai a ni.

JD(U)-BJP ṭangrual sorkar hi House-ah fiah zui nghal a ni a, Nitish Kumar-a kaihhruai sorkar hian member 243 awmna House-ah thlawptu member 131 a nei a ni.

JD(U) hian BJP nen thawkdunin sorkar thar siam mah se, August 5-a vice president thlanna neih turah a hmaa thu­tlukna an lo siam tawh angin eptu lam candidate Ram Gopal Krishna chu an vote dawn tih a sawi. JD(U) thupuangtu KC Tyagi chuan hemi chung­chang hi BJP pawh an hriattir tawh thu a sawi.