Kalam-a lim bula Quran leh Bible dah sawisel

President hlui, APJ Abdul Kalam-a hriatrengna, Rameswaram-a a lim bulah chuan Bible leh Quran dah a ni a, hri hi Hindu pawlte chuan an sawisel.

Kalam-a hriat­rengna hmun siam hi July 27 khan Prime Minister Narendra Modi chuan a hawng a, Kalam-a lim bulah hian Hindu lehkhabu thianghlim, Bhagavad Gita dah a nih hnuah, Kristian leh Muslim-te lehkhabu thianghlim, Bible leh Quran dah ve leh a ni.

Mahse Hindu pawlte chuan Bible leh Quran dah hi an duh lo a, Hindu Makkal Katchi hruaitu K Prahbhakaran chuan police-ah complaint thehlutin, thuneitute phalna la loin heng lehkhabute hi dah niin a sawi. Sakhaw dangte chu a zah vek tih sawiin, Prabhakran chuan phalna nei loa an dah an sakhaw lehkhabu an dah ringawt erawh chu thil dik lo a ni tih a sawi.

Hetihlai hian Kalam-a chhungte, Sheik Dawood leh Salim chuan mi ṭhenkhatin ṭul loah thil an sawibuai mai mai nia an ngaih thu an sawi. Kalam-a hriatrengna hmun siam hna hi DRDO official-te hah takin an thawk a, a lim bula Bhagavad Gita lim an ker pawh chu tum ṭha lo neia tih a nih loh thu sawiin, Quran leh Bible te chu an dah ve leh ta tih an sawi. Tamil lehkhabu pawimawh, Thirukkural pawh mi lim bulah chuan dah leh an tum thu an sawi bawk.

Kalam-a chu India mi zawng zawnga tana hruaitu a ni a, hei vang hian a chung­chang thu hi a kawi zawnga lo kalpui lo turin an ngen. Kalam hriatrengna hmun siamah hian lemziak 900 leh a thlalak 200 vel dah a ni.