Armed Forces veteran-te’n PM lehkha thawn

Armed Forces veteran 100 chuang chuan Prime Minister Narendra Modi chu lehkha thawnin, ram chhungah Muslim leh Dalit miten beih leh enhran an tawk ṭhin chu an dem thu an hrilh.

Veteran 114-te’n an hming an sign hnanna lehkhaah hian, an ṭhatlaiin ram himna turin theihtawp chhuahin an lo thawk tawh a, an hanthawk chhung hian political party ṭan bik pawh nei loin an thawk a, ram danpuiin a duh ang hlenchhuah chu an tum ber a nih thu an sawi.

Mahse ramchhunga hnam hnuaihnung leh tlem zawkte beihna thleng fo chu an ngaihthah ngawt thei lo tih sawiin, hnam leh sakhaw hrang hrang awmkhawm chu India chakna a ni, an ti.

Tun hnaia Delhi bula Muslim rawlthar, kum 16 mi bawngsa ei mi a nih avanga mipui thinrimin an sawisak hlum avanga lung­awi lohna lantirna atana ‘Not in My Name’ campaign kalpui chu an thlawp thu veteran-te chuan an sawi a, Muslim leh Dalit-te beih an ni fo chu an dem thu sawiin, mimala a duh ang sawi tura zalenna a neihte rahbeh sak an ni ṭhinte chu ṭha an ti lo hle tih an sawi bawk.