India-a Covid-19 kai thar tam ber ni - May 2 Darkar 24 chhungin hri kai thar 2,644 awm

India ramah Inrinni kha ni khat thilthua coronavirus kai thar an tam ber ni a ni a, hri kai thar hi mi 2,644 an awm. Hemi ni vek hian mi 83 an thi a ni.

Darkar 24 chhunga thil thlen dan aṭanga chhutin, India ramah darkar khat chhungin hri kai thar hi 110 zel awm ang leh, darkar khat chhung vek hian Covid-19 vang hian mi pathum zel thi ang an ni.  

Ministry of Health and Family Welfare in a tarlan danin nizan thleng khan ram pumah Covid-19 kai hi  mi 39,980 an awm tawh a, an zinga 1,301 chuan an thihpui tawh a ni. Kar liam ta, kar khat chhung khan hri kai thar hi 13,000 chuang an tling hman. 

Maharashtra chu hri leng hluarna ber state niin, hrikai hi 12,000 an tling tawh a, mi 521 in an thihpui tawh. Gujarat chu a dawttu niin nimin khan hri ki hi 5,054 an awm a, mi 262 an thi tawh a ni. Delhi-ah Inrinni khan hri kai thar hi mi 384 awmin, hri kai awm zat hi 4,122 a tling tawh a, mi 64 in an thihpui tawh a ni. 

Hri kai zinga 10,633 chu enkawl dam an ni tawh tih sorkar laipui chuan a puang a, sample maktaduai khat chuang test a ni tawh bawk. 

Hri leng darh zel tur venna atan sorkar laipui chuan May 17 thleng lockdown a pawtsei leh a, mahse red zone tih lohah chuan khuahkhirhna tam zawk thlahdul a ni thung. Covid-19 zone siam hnuaiah red zone 130, orange zone 284 leh green zone 319 a awm. 

Directorate General of Civil Aviation (DGCA) chuan lockdown pawhsei a nih avangin May 17 thleng domestic leh  international commercial flight tihtawp a la ni chhunzawm dawn tih Inrinni khan a puang. 

All India Chemists and Druggists Association president Jagannath Shinde chuan India ramah damdawi stock a tam tawk tih sawiin, mipuite chu chiai lo turin a ngen. Thane chuan damdawi stock awmsa hian July thleng a daih tih sawiin, damdawi siamtu company hrang hrang aṭangin supply pawh an dawng ṭha reng tih a sawi a ni. Ram pumah damdawi dawr maktaduai 8.50 vel a awm a, hengah hian mipuite mamawh damdawi chi hrang hrang a awm reng a ni, a ti.