Kejriwal-a'n Independence hnua sorkar eiru nasa berah BJP a puh ; Assembly-ah CM-in AAP sorkar rin tawkna motion pu lut

Delhi-a rorellai, Aam Aadmi Party (AAP) leh centre-a sorkarna changtu, BJP chu an inbei chhunzawm zel. Delhi chief minister, AAP hotu Arvind Kejriwal chuan India zalenna neih hnu, kum 75 chhunga sorkar eiru nasa berah BJP sorkar chu a puh.

Nimin khan Delhi Assembly special session neih a ni a, CM Kejriwal chuan a kaihhruai sorkar rin tawkna motion a pu lut. Hei hi BJP-in sum leh thil dang hmanga a kaihhruai sorkar paihthlak tuma a beihna, Operation Lotus an neih a hlawhchhamna leh, an party MLA tumah an lei thei lo tih fiahna atana ti a nih thu a sawi.

Kejriwal chuan BJP chu AAP MLA 40 lei tumin, MLA pakhat chu BJP-a an luh chuan Rs vbc 20 zel pek an tiam tih a sawi. "AAP MLA tinte hi an rinawm tawk a ni tih pholanna turin trust vote lak hi a ngai a ni. Confidence motion hmang hian BJP hian MLA pakhat pawh a lei lo tih kan lantir dawn," tiin a sawi. Vawiin chawhma dar 11-ah vote hi an la ang. Seat 70 awmna Delhi Assembly-ah hian AAP hian MLA 62 neiin, BJP hian pariat a nei a ni.

BJP chuan Delhi sorkar paihthlak tumin Rs vbc 800 a nei a, state dang eng emaw zatah sorkar tibuaiin an paihthla tawh bawk a ni, tiin Kejriwal chuan a sawi. Mipuite chhiah pek khawm chu BJP sorkar chuan hmasawnna hna thawhna atan hmang loin, an ṭhianṭha tan an pe zawk a, hei vang hian fuel man pawh a to phah a, khawvel puma a man tlakhniam laiin India ramah chuan a sang zawk a ni, a ti.

"Ram chhunga thil man sang chak avangin mipuite an lungngai a, an ei leh in thlengin an tihtlem phah tawh. Mipuite chuan thil man sang chho zel hi a nih dan tur anga thleng ve rengah an ngai. Mahse hei hi a ni lo, sorkar laipuiin thil zawng zawngah chhiah a lak avanga thleng a ni zawk. Hetiang hi tun hmain athleng ngai lo. British-te pawh khan food item-ah chhiah an la ngai lo," tiin Kejriwal chuan a sawi.