Oct 17-ah Congress party President thlang dawn

Congress party-a thuneitu sang, Congress Working Commtitee (CWC) chuan an party President thar thlan hun atan October 17 a ruat.

Congress party president chuh tumte tan September 24 aṭangin nomination a thehluh theih dawn a, October 8 thleng inhnuhdawh theih a ni ang. October 17-ah inthlangin, vote tlate hi October 19-ah an chhiar dawn a ni.

Pathiannia party president Sonia Gandhi kaihhruaia CWC meeting-ah he thutlukna hi an siam a ni.

Congress thupuangtu, Jairam Ramesh chuan political party zingah democracy kalphung ang taka party hotu lu ber tur thlanna buatsaih ṭhin awmchhun a ni tih sawiin, inthlanah hian tupawhin nomination an thehlut thei a ni, a ti.

Party hruaitu hlun zingah an party president atana Rahul Gandhi duhtu hi an la tam hle. Senior leader Salman Khurshid chuan inthlan neih hun tur puan a nih hnuah, Rahul Gandhi chuan an party hotu lu ber atan a tam zawkin an duh ber a la ni reng tih sawiin, party president dinhmun chelh tur hian a zin haw hunah nawr zui an tum tih a sawi. Rahul Gandhi hi ram pawn lama a zin bo lai a nih avangin CWC meeting-ah pawh hian virtual hmangin a tel a ni.

Congress president thar tura hming sawilan langsar zinga mi, Rajasthan chief minister Ashok Gehlot pawhin Rahul Gandhi chuan a party kaihhruai turin a tawp thlengin nawr a tum tih a sawi ve bawk.

Parliament inthlan­puia a zawna Congress party an chet chhiat hnuah, Rahul Gandhi hian party president a nihna aṭangin banna a thehlut a ni. Hemi hnu hian a nu, Sonia Gandhi chu interim president-ah dah a ni.