Hijab khap chungchangah SC-in Karnataka sorkar hriattirna pe

Supreme Court chuan Karnataka sorkar chu an state-a zirna in hrang hranga Muslim hmeichhiate hmai khuhna, hijab khapna siam a hlih duh loh avanga petition thehluh chungchangah insawifiah turin hriattirna a pe.

Justice Heman Gupta leh Suhdanshu Dhulia awmna bench chuan Karnataka sorkar chu hriattirna hi pein, September 5-ah hearing an nei leh ang.

Hijab vanga buaina hi kumin January thla khan a chhuak ṭan a,Udupi-a sorkar college pakhatah hmeichhia parukte chu hijab an hman avangin classroom an luh khap an ni a, college pawnah lungawi lohna an lantir a, hmun hrang hrangah Muslim-ten lungawi lohna an lantir zui bawk. Hemi hnu hian Udupi-a college hrang hrangah Hindu mipate chuan saffron scarve an awrh zui ve leh a ni.

Karnataka state chhung hmun hrang hrangah buaina hi a darh zui a, hei vang hian state sorkar chuan zirlaite chu sakhaw kaihhnawih thuam, hijab leh saffron scarve-te chu college-ah an inbel khapin, uniform chauh inbel turin a ti a ni. February 5 khan Pre-University Education Board chuan thuchhuah siamin, zirlaite chu school thuneituten an pawm uniform chauh zirna inah an inbel phalsak a nih thu a sawi. Management committee lamin uniform an siam lo a nih chuan, zirlaite chuan thawmhaw pangngai, sakhaw lam thila buaina thlen thei lo chi an inbel tur a ni, a ti bawk.