Journalist-te hi an hnathawh avangin kan zah: Mamata
West Bengal chief minister Mamata Banerjee chuan democracy rama press hmaklakna chu fakin media mite chuan an hna chu hlauh nei loin an thawk tur a ni, a ti.
Mamata Banerjee chuan nimin khan a twitter-ah, "Press hi democracy innghahna lungphum palina a ni a, hlauh nei loin an hna an thawk tur a ni. Journalist-te hi society tana an hnathawh avangin kan zah. Kan sorkar pawhin Covid dona kawnga hmatawngtute tan health insurance cheng nuai 10 thleng huam thei a siam tawh a, chung zingah chuan journalist-te pawh an tel," tiin a sawi.
Banerjee hian a post siamah hain #PressFreedomDay a dahtel nghe nghe a ni.
Haryana sorkar pawhin thla hmasa khan hripui leng kara news report hna thawktu journalist-te chu insuarance cheng nuai 10 thleng a pek dawn thu a puang tawh bawk a, hei hi Mumbai leh Chennai-a journalist eng emaw zatin hrileng an kai tih hriat chhuah a nih hnua a puan a ni. West Bengal hian April 21 khan journalist-te tana insurance hi a puang ve thung.
World Press Freedom Day hi kumtin May 3-ah hman a ni ṭhin. United Nations General Assembly December, 1993-a neih chuan UNESCO General Conference in thurawn a pel angin May 3 hi World Press Freedom Day-ah a puang a, hemi hnu hian kumtin hman a ni ṭhin. Windhoek Declaration hriatrengna tura tih a ni bawk.
Kum 1991 khan African newspaper journalist-te chuan free press principle Nambia khawpui Windhoek-ah an duang a ni.
Global press freedom index-ah ram 180 zingah India chu 142-na a ni mek a, nikum lam khan 140-naah a awm thung.