Kashmir-a inkahna thlengah sipai 4 thi
Kashmir hmar lama awm Handwara-ah nimin khan firfiakte leh sipaite inbeihna a thleng a, J&K police officer pakhat leh sipai 4 leh an thi.
India army thi zingah hian Indian Army counter-insurgency force Commanding Officer a tel a, ani bakah hian Major pakhat leh sipai pahnih an thi bawk. Sipaite hian firfiak pahnih an kaphlum ve bawk a ni.
Kar kal ta Inrinni khan firfiakte hian Kashmir hmar lama awm Handwara khuaa Changimulla village-a mi chenna inah civil mi an hreng nia sawi a ni a, he mite chhanchhuah tum hian sipaite leh J&K police-te chu an kal a ni. Firfiakte hian sipaite lo bei hmasain, sipai pali leh J&K police officer pakhat an kap hlum. Mahse sipaite hian firfiakten an hrente hi him takin an chhanchhuak a ni.
Changimulla khuaa civil mi chhanchhuah tuma kal, sipai leh J&K police-te hi 21 RRR Commanding Officer Colonel Ashutosh Sharma-a'n a ho a, a hma pawhin ani ho hian firfiak beihna hlawhtling tak takte neih a lo ni tawh bawk.
Nimina Kashmir-a inbeihna thlenga sipai leh police thi an awm chu defence minister Rajnath Singh chuan pawi a tih thu sawiin, ram tana nunna chantu chhungte chu a tawrhpui thu a sawi.