LeT hotu Abu Dujana kaphlum

Lashkar-e-Toiba (LeT) firfiak pawl commander, Abu Dujana (26) chu nimin khan Jammu and Kashmir-a Pulwana district-ah security force-te’n an kaphlum.

Pulwana district-a Hakripora khuaa firfiak leh security force-te inbeihnaah hian firfiak dang, Arif Lalihaari pawh kahhlum a ni bawk.

State police hotu SP Vaid chuan thil thlen dan kimchang sawi theih a la nih loh thu leh, ruangte hi lakchhuah an nih hunah information kimchang pekchhuak a nih chauh tur thu a sawi. Firfiakte kahhlum an nih hnu hian tualchhung mite chuan security force-te chu lungin an tawng zui a, mi pahnihin hliam an tuar. Security force-te chuan mipui hnawhdarh nan tear gas bakah pellet gun te an hmang a ni.

182 Battalion, 183 Battalion, Central Reserve Police Force (CRPF), 55 Rashtriya Rifles (RR) leh Special Operations Group (SOG)-te chuan thu an dawh bawhzuiin nimin zing dar 4:30 vel khan Hakripota khuaah hian firfiak dap hna hi an thawk a ni. Firfiakte hian lo kap hmasain, an inbei zui ta a ni. Firfiak leh security force-te inbeihnaah hian khawchhunga in pahnih pawh a chhia a, mahse civil mi zingah hliam tuar an awm hriat a ni lo.

LeT Kashmir chief, Dujana hi security force leh civil mite beihna thubuai 30 chuanga man tuma zawn mek a ni a, a lu manah pawh cheng nuai 15 phal a ni. State chhunga militant commander man tuma zawn nasat ber a ni mek a ni.

LeT commander Dujana thah a nih avang hian buaina nasa zawk a chhuah venthawn thilah nimin khan Kashmir Valley-ah mobile internet service tihtawp a ni. Police official-te chuan boruak tichhe zawnga thu thehdarh tur venna atan mobile internet service hi tihtawp a nih thu an sawi a, broadband internet service erawh tihtawp a ni lo a, mahse video leh thlalak lian zawk upload tur venna atan a speed tihhniam a ni thung.