BJP MP-te chungah party president a lungawi lo

BJP President Amit Shah chu Thawhṭannia Rajya Sabha rorel inkhawmah an party MP-te an tel ṭhat loh avangin a lungawi lo hle.

Thawhṭannia Rajya Sabha rorel inkhawmah khan BJP MP-te an tel ṭha lo a, hei vang hian eptu lam duhdan angin backward classes bill siam pawh tihdanglam a ni.

Amit Shah chuan MP-te chu mipuiten House-a an aiawh tura an thlante an ni a, hei vang hian rorel inkhawm an ṭhulh mai ṭhin chu thil ṭha lo tak a nih thu a sawi. Shah chuan Thawhṭannia Rajya Sabha inkhawma tello, BJP MP-te chu a mal mala biak vek a tum tih a sawi bawk.

Kar kalta khan Prime Minister Narendra Modi chuan an party MP-te chu Parliament in hniha rorel inkhawm neih mekah tel zel turin a lo hriattir tawh bawk.

Thawhṭanni khan Rajya Sabha inkhawmah BJP leh an thawhpui party MP 30 chuang an tello a, an zingah hian minister panga an tel. He inkhawmah hian eptute chuan backward classes bill siamṭhatna tur an pu lut a, pass zui nghal a ni. He bill siamṭhatna hi Lok Sabha-ah ngaihtuah tura thawn let leh a ni ang.