Delhi Assembly Secretariat-ah MP-te luh khap

Delhi Assembly Secretariat chuan nimin khan thuchhuah siamin, Secretariat compound-ah MP leh political leader-te luh a khap.

Delhi-a rorellai Aam Aadmi Party (AAP) leh eptu, BJP te inepna kal mekah, Thawhṭanni khan party pahnih MLA-te hian Secretariat compound-ah hian lungawi lohna an lantir ve ve a ni.

Nimina Secretariat-in thupek a tihchhuah hnuah, BJP hruaitu leh South MP Ramesh Bidhuri chu Assembly reception-ah kal luiin, an party MP-te pawh an kal vek dawn tih a sawi a, mahse gate-ah an lo dang a ni.

Assembly deputy speaker chuan rorellai leh eptu party member-ten Assembly complex chhungah nawrh an huaihawt tih a hriatin, thil duhawm lo a thlen lohna turin security khauh zawka kalpui turin a ti a ni, tiin thuchhuah chuan a tarlang.

Thuchhuah chuan Assembly complex-ah hian MLA in a kalpui, visitor pakhat chauh zel luh phalsak an ni dawn a, hei pawh hi uluk taka enfiah phawt a ni ang, a ti. "Parliament member leh political party leader-te erawh chu Assembly complex-ah hian phalsak an ni lo," a ti.

AAP MLA-te hian Delhi lieutenant governor VK Saxena chu kum ruk liam taa a thiltih dik lo chungchangah chhui chian an phut. Saxena hian kum 2016-a Khadi and Village Industries Commission chairman a nih lai khan, pawisa tih thih tawh note, Rs vbc 1,400 chu a hnuaia thawk pahnih a thleng luih tir niin an puh. Hetih lai hian BJP lam chuan thil dik tawk lo tia puhin Delhi minister pahnih, Manish Sisodia leh Satyendar Jain-te chu bang turin an phut ve bawk.