CBI-in Ghaziabad-a Sisodia bank locker an dap

Central Bureau of Investigation (CBI) team chuan nimin khan Ghaziabad-ah Punjab National Bank (PNB)-a Delhi deputy chief minister, Manish Sisodia-a locker an dap.

Member panga awmna, CBI team hian Delhi Excise Policy 2021-22 kalpui a nih danah thil dik tawk lo a awm niin an sawi a, mi 15 laka FIR thehluh an chhui zuinaah Manish Sisodia chenna in pawh hi an lo dap tawh bawk.

Nimina bank locker an endik lai hian Sisodia leh a nupui chu bank-ah hian an awm ve a ni.

Sisidoa leh AAP chuan an puhna hi thu dik lo a nih thu leh, BJP chu politics lama a khingpuite nuaibo tuma dik lo taka central agency-te hmang ṭhinah an puh. Delhi chief minister Arvind Kejriwal chuan BJP kaihhruai sorkar laipui chuan BJP sorkar lohna state-a sorkar tihbuai leh paihthlak tuma serial killer ang maia cheah a lo puh tawh a ni.

CBI team in a locker leh a chenna in an dapnaah engmah an hmu lo tih Sisodia chuan a sawi a, a locker-ah hian a nupui leh fate ta, tlereuh Rs 70,000 hu chauh a awm thu a sawi. Prime Minister-in a in leh a locker a daptirnaah a beisei ang hmuh an nei lo a ni, a ti. CBI official-te ngei pawhin engmah an hmu dawn lo tih an hre sa vek a, mahse PM-in jail-a tantir theihna tur thil eng emaw zat hmuh ngei a duh avanga a nawr vangin a thu an zawm mai niin a sawi bawk.