ED-in thu zawhfiah turin TMC hruaitu ko

Enforcement Directorate (ED) chuan Trinamool Congress (TMC) national general secretary, Abhishek Banerjee chu coal scam kaihhnawihah thu zawhfiah turin a ko.

Central agency hian West Bengal chief minister Mamata Banerjee-i vahpa, Abhishek hi Zirtawpnia Kolkata-a an office-a kal turin nimin khan a hrilh a ni. He hunah hian Abhishek thu zawt tur hian New Delhi lama ED officer-te an kal tur thu an sawi.

ED hian kumin March 21 khan Abhishek hi New Delhi-a an office-ah an lo ko tawh bawk a, darkar kua zet thu an zawtfiah a ni. Nikkum September 5 khan an ko tawh bawk a, a nupui Rujira Banerjee pawh an ko tawh bawk.

Abhishek hian Thawhṭannia rally a neihah, BJP leh Amit Shah-a fapa, BCCI secretary Jay Shah chu na takin a bei. BJP hruaitute chu dik lo taka bawng tawlhluh ṭhin hlawkpui berte an nih thu sawiin, dik lo taka thiltih hmanga sum hmuhte chu New Delhi lama BJP hruaitute kuta thawn a ni ṭhin, a ti. Amit Shah fapa, Jay Shah-a'n cricket match-a India-in Pakistan a hneh ṭumin, India national flag vai tura an pek chu a lo hnar lai video clip darh pawh sawichhuakin, BJP hruaitute chuan 'Har Ghar Tiranga' duangchhuaktu nia an insawi laiin, Home Minister fapa chuan India chak lawm nan national flag pawh a vai duh lo a ni, a ti.