Sharad Yadav-a’n party thar din a tum

Bihar Chief Minister leh Janata Dal (United) hotu, Nitish Kumar-a’n RJD leh Congress party nena an thawhhona chhuahsan a, BJP kaihhruai NDA a zawm avangin JD(U) hruaitu hlun Sharad Yadav a lungawi lo hle a, JD(U) chhuahsanin political party thar a din dawn nia sawi a ni.

Sharad Yadav-a ṭhian hnai tak, Vijay Verman chuan Yadav hian state chhunga JD(U) unit hruaitu hrang hrangte pawh nimin kha a hmu tih a sawi. Party thar a din thu hi tunkar chhungin puan hmang ngei a ni dawn tih a sawi bawk.

JD(U) hruaitu ṭhenkhat chuan Sharad-a’n Nitish Kumar-a thutlukna a pawmpui lo chu an hriatthiam thu an sawi. Senior leader leh party thupuangtu, Sanjay Singh chan, “Sharad hi kan hruaitu hlun a ni a, mahse kawng dang a thlang ta a ni. A duh anga kal turin zalenna a nei a ni”, a ti.

July 26 khan Nitish Kumar hian engmah sawi lawk loin RJD leh Congress party nena an thawhhona, Grand Alliance chu chhuahsanin chief minister a nihna aṭangin a bang a, mahse a tuk maiah BJP thawhpuiin ṭangrual sorkar thar an siam leh nghal a ni.