Karnataka minister chenna-in dap

Income Tax official-te’n nimin khan Karnataka Minister DK Shivakumar chenna-in an dap a, a in aṭangin pawisa fai cheng vaibelchhe 7.5 hmuh a ni. Shivakumar hi Gujarat Congress MLA-te nena an awmna, Bengaluru-a luxury resort aṭangin thu zawhfiah tura hruai a ni bawk.

Karnataka-a Energy Minister Shivakumar hi chhiah awlrua puh a ni a, hei vang hian a in leh a khawsakna, luxury resort hi dap a ni.

Nimin zing khan Income Tax official-te chuan Central Reserve Police Force (CRPF) nen Shivakumar leh Gujarat MLA 44-te awmna, Eagleton Golf Resort-ah an va zawng a ni. He hmun­ah hian Shivakumar leh MLA-te hi ni li an awm tawh a ni. Resort-a a room chu dap a nih hnuin, thu zawhfiah turin hruai a ni.

Gujarat-ah hian kar leh Thawhlehni-ah Rajya Sabha inthlan neih a ni dawn a, inthlan dawn hnaiah hian Congress MLA paruk-te’n an party an chhuahsan a, hei vang hian Congress party chuan party MLA dangte hi kar kalta Zirtawpni khan Bengaluru-ah hian a tir a ni. Heng MLA-te hi Shivakumar hian a lo buaipui a ni. Gujarat-ah hian kumin kumtawp lamah assembly inthlan neih a ni dawn bawk.

Congress party chuan an party MLA-te awmkhawmna hmun va dap a, IT official-te’n an kalchilh chu sawiselin, he thil hi BJP-in Rajya Sabah seat khat lek chauh pawh lak tuma an hmalakna niin an sawi. Congress chuan an party MLA-te hi Gujarat-a rorellai, BJP chuan an pawla lak tumin an thlem a, Thawhlehni-a Rajya Sabha inthlan neih turah BJP thlawp tura thlemin cheng vaibelchhe 15 thlengin pek an tiam a ni, a ti. Hei vang hian an party MLA-te hi Bengaluru-ah kalpui an nih thu a sawi bawk.

Rajya Sabha-a eptu hruaitu leh Congress paty hruaitu, Ghulam Nabi Azad chuan Congress MLA-te hnena thamna, cheng vaibel­chhe 15 pek tumtu, BJP MLA-te chenna-in te chu dapsak ve tura an phut thu a sawi. Congress MP Anand Sharma pawhin sorkar chuan thuneihna dik lo takin a hmang fo tih a sawi a, Karnataka minister leh a unaupa chu mipuiten an aiawht tura an thlante an ni a, BJP in an pawla thlem luh a tum Gujarat MLA-te an lo buaipui a, hei vang hian bitum an ni ta a ni, a ti.