Gorkha-te’n nawrh huaihawt chhunzawm zel

West Bengal aṭanga Gor­kha­land state hran siam phut­in Gorkha Janmukti Morcha (GJM) kaihhruaiin nawrh huaihawt chhunzawm zel a ni a, nimin kha ni 50 nawrh an huaihawtna a ni tawh.

Ni 50 zet nawrh huaihawt ni tawh mah se inremna a la awm thei lo a, state sorkar chuan an thil phut hi pek a tum lo. Nawrh huaihawt avang hian sorkar leh mimal hmun eng emaw zat hal leh tihchhiat a ni tawh a, sorkar motor, office building, tourist lodge, Darjeeling Himalayan Railway station pahnih leh hydro power generation project panga chu tihchhiat zingah hian a tel.

Hydel project tihchhiat avang­a ni khat sum hloh zat hi cheng vaibelchhe thum vel a ni a, sorkar hmun tihchhiat hi cheng vaibelchhe 15 hu a tling bawk.

Darjeeling hills area-a buaina bul inṭanna hi June thlaa Bengal sorkarin sorkar school-a Bengali ṭawng zir ngei ngei tura thuchhuah a siam vang a ni. Hei hi duh loin hills area-ah hian nawrh huaihawt a ni a, June 15-a police-te’n GJM hotu BImal Gurung-a office an dapsak avang khan buaina hi a punlun chho ta a ni. Nawrh huaihawtnaa tharum thawhna thlengah mi pariat an thi tawh a, mi dang eng emaw zatin hliam an tuar tawh bawk.

Gorkha-te’n Gorkhaland state hran an phutna hi hun rei tak aṭanga kalpui a lo ni tawh a, kum 1988 khan state hran phut hian ni 40 nawrh an lo huaihawt tawh a, kum 2013 khan ni 44 nawrh an lo huaihawt tawh bawk.

Hetihlai hian West Bengal Chief Minister Mamata Banerjee-i chuan Darjeeling-a nawrh huaihawt mekte hi hmarchhak leh rampawna helpawl nen inzawmna neiah a puh a, BJP chu buaina tipuluntuah a puh bawk.