Vawiinah vice president thlang dawn

Vawiin hian Parliament member-te chuan India vice president thar tur an thlang dawn a, rorellai NDA candidate M Venkaiah Naidu chu tling tura rin a ni.

Vice president hi NDA candidate M Venkaiah Naidu leh eptu candidate inṭawm, Ram Gopal Krishna-te’n an chuh dawn a, vawiin tlai lamah result hi puan nghal a ni ang. President thlan ṭuma NDA candidate Ram Nath Kovind thlawptu, BJD leh JD(U) chuan vawiina vice president thlan turah hian eptu lam candidate an thlawp dawn tih an sawi.

Parliament member-te chuan vote thlakna tur hian a bika ruat pen an hmang dawn a, chawhma dar 10 leh tlai dar 5 inkarah vote thlak a ni ang. Vote tla te hi chhiar nghal a ni ang a, zan dar 7-ah inthlan result hi puan a ni dawn tih, Election Commission official-te chuan an sawi.

Vice president thlangtu tur, electoral college-ah hian Parliament in hniha member-te an awm a ni. House pahnih member tam lam hi 790 a ni a, mahse Lok Sabha-ah seat hnih leh Rajya Sabha-ah seat khat a ruak mek a ni. Hei bakah hian BJP Lok Sabha MP Chhedi Paswan chu a vote thlak khapsak a ni bawk.

Member 545 awmna Lok Sabha-ah hian BJP chuan member 281 a nei a, BJP kaihhruai NDA hnuaia thawhpuite nen member 338 an awm a ni. Member 243 awmna Rajya Sabha-ah BJP hian member 56 a nei mek a, Congress chu party mala member ngah ber niin member 59 a nei a ni.

Vice president thlannaah hian candidate zingah vote tla aṭanga 50% hmu pha chu tlinga puan a ni ang.