Ramdang EVM aiin kan EVM a ṭha zawk : EC

Election Commission chuan Supreme Court hnenah vote thlakna atana hman, electronic voting machine (EVM) chu khawl rintlak tak, khawih danglam theih loh a nih thu sawiin ramdang EVM aiin a ṭha zawk niin a sawi.

Supreme Court-a affidavit a thehluhah, EC Director (Law) Vijay Kumar Pandey chuan EVM rintlak tawk lohna finfiahna engmah a awm loh vangin court-a EVM chungchanga PIL thehluhte pawh hnawl vek tura a duh thu a sawi.

EC chuan India rama EVM hmante chu US, Germany, Netherlands leh Ireland-a electronic voting machine hman aiin a ṭha zawk niin a sawi. Ram pawn lama EVM te chu internet connectivity hmanga kalpui a ni a, mahse India rama EVM-ah chuan hetiang hi a ngai ve lo a ni, a ti.

Tun hnaia a duh apiang tana EVM khawih danglam theihna hun a siamah khan, eng party mahin a ṭhat lohna hailan tumin an bei lo tih a sawi a, EVM hi khawih danglam theih a ni tih finfiahna engmah a awm lo bawk a ni, tiin EC chuan a sawi.

Commission chuan EVM-te chu enchhin fo an nih thu leh, inthlan dawnah phei chuan hei hi tihziah a nih thu a sawi. EC hian kum 2019 Lok Sabha inthlanpuiah EVM hi voter verifiable paper audit trails (VVPAT) nen hman a tum a ni.