BJP-in W. Bengal CM bang turin an phut

Bharatiya Janata Party (BJP) chuan West Bengal Chief Minister Mamata Banerjee-i chu a vahpa, Trinamool Congress (TMC) MP Abishek Banerjee-a eirua puh a nih chungchangah bang turin an phut.

BJP chuan CM Banerjee-i hi a vahpa hian a eiru lo tih a finfiah theih loh chuan CM a nihna aṭanga bang mai tura an phut thu an sawi. Hei hi TMC chuan chhang letin, BJP hian CM hi bang tura phut ngawt thei an ni lo tih sawiin, Banerjee-i chu zahawmna leh dikna duhtu, hruaitu huaisen a nih thu party secretary general Partha Chatterjee chuan a sawi. Union Minister Prakash Javadekar chuan Delhi-a press conference a neihah, Abishek hian Leaps and Bounds Pvt Ltd firm director a nih laiin realtor Raj Kishore Modi hnen aṭangin thamna cheng vaibelchhe 1.15 a dawng niin a puh.