RS-a information dik lo peah Sushma Swaraj-i puh
Congress party leh eptu party dangte chuan External Affairs Minister Sushma Swaraj-i chu kum 2015-a Prime Minister Narendra Modi-a’n Lahore a tlawh leh, hemi kum veka Indonesia-a Bandung Conference neih chungchang a sawiah Rajya Sabha chu information dik lo peah an puh a, a lakah privilege motion an pu lut.
Sushma Swaraj-i hian kum 2015-a Bandung Asia Africa relations conference-ah khan India aiawhin thu a sawi lo niin a sawi a, mahse eptute chuan thu a sawi ngei thu tarlangin, a thu sawi lai video an download chu finfiahna atan an dah tel bawk. Bandung conference chungchang a sawidan avang hian Ningani-a Rajya Sabha inkhawmah khan sorkar leh eptu lamte chu nasa takin an lo inhnial tawh a ni. Senior Congress member Anand Sharma chuan he conference-a Minister of State for External Affairs VK Singh-a’n thu a sawinaah, India ram prime minister hmasa ber Jawaharlal Nehru’-a hming chu a sawihmaih lui niin a sawi. Nehru hi kum 1955-a Bandung Conference dintu, founder member zingah a tel a ni. Mahse Sushma Swaraj-i chuan he conference-ah hian India aiawhin thu sawi an awm lo tih a sawi a, hei hi eptute chuan hnialin, a thusawi lai video an download pawh chu an pe tel a ni.
Swaraj-i laka privilege motion putluh dang chu kum 2015-a PM Modi-a’n Lahore a tlawh hnuah, ram chhungah firfiakte pawikhawihna thleng a awm tawh lo tia a sawi chungchangah a ni. Eptute chuan firifakten Pathankot air base an beih pawh kha, PM-in Lahore a tlawh hnua lawka thleng a ni a, hei bakah hian firfiakte kaihhnawih pawikhawihna dang pawh vawi nga dang a thleng leh bawk niin an sawi. Sharma chuan PM Modi-a’n Pakistan a tlawh chhan hi hriat an duh thu sawiin, tun thlengin a zin chungchang kimchang hi tumahin an la hre lo a ni, a ti.