Punjab Pastor car halsak Biak-ina Isua leh Mari lim suasam

Punjab-a Tarn Taran district-ah Thawhlehni zan khan Kristian biak-inah misual lutin, biak-in chhunga Isua leh Mari lim dahte an tichhia a, pastor car an halsak bawk.

Police-te chuan biak-ina lutte hi mi pali niin an hmai an tuam vek a, biak-in enkawltu chu pistol-a tinin an vau a, a kut an phuarsak hnuah biak-in chhunga bungrua an suasam a, pastor motor pawh an hal zui niin an sawi.

CCTV footage-ah pawh misualten hriamhrei hmanga biak-in chhunga Isua leh Mari an tihchhiat lai leh, mi lim lu chhuata an dahte hmuh tur a awm.

Police-te chuan pawikhawihtute hi rinhlelh an nei tih sawiin, FIR pawh ziahluh a ni tawh bawk. Misualte chu man thuai an nih tur thu an sawi.

Chief minister Bhagwant Mann chuan he thil thleng hi pawi a tih thu sawiin, an state-a sakhaw thila inbeihna leh, midangte harsatna siamsak chu an remti ngai lo tih a sawi. "Punjab inpumkhatna ṭha tak hi tumahin an tihchhiat kan phal dawn lo. Tarn Taran-a thil thleng hi a vanduaithlak takzet a, kan chhui chiang dawn a, pawikhawihtute chungah na takin action lak a ni ang," a ti.

Nimin khan state chhung hmun hrang hrangah Kristian-te chuan biak-in Tarn Taran-a thil thleng duh lohna hi lantirin Khemkaran, Bhikhiwind, Patti, Harike, leh Ferozepur-ahte kawng an dang a, pawikhawihtute chu man thuai an phut thu an sawi.

He pawikhawihna thlen hma hian Sikh sakhaw thuneitu sang zinga mi, Akal Takht-a hotu, Jathedar Giani Harpreet Singh chuan Kristian missionary-te chu tihluihna hmanga an sakhuaa Sikh mite inlehtirah a puh. Singh chuan Sikh leh Hindu-te chu an rilru hruaikawi sakin, Kristianah inleh tir an ni, tiin Facebook-ah a live-naah a sawi a ni. Sorkar laipui chuan hetiang thil thleng hi thunun a, khuahkhirh turin a phut thu a sawi bawk. Hetianga ualau taka Kristiante a sawisel hnuah he pawikhawihna hi a thleng zui ta a ni.